Dagok nga sa puso
ang pagbubukas ng pinto,
sapagka’t ako’y naiipit
sa pagitan ng kahoy at semento;
di mo nakikita, at di mo nalalaman
ngunit ako’y pisa at nasusugatan
para lamang ikaw ay makapasok
nakangiti’t nagmamadali
upang siya’y makitang
naghihintay sa kabila. . .

Di mo ba nalalaman—
paano mo malalaman—
na ako’y pisa sa likod ng pinto,
at siya pang nagbukas nito
para sa ‘yo?

Kay Y.